طريقة صنع الزيبرا كيك وريبون الهدية بالفوندانHow to make zebra cake with ribbon

السلام عليكم ورجعتلكم من جديد بكيكة وافكار جديدة راح احاول اوصلها باسهل وابسط الطرق وان شاء الله طالما بناتي خلصت امتحاناتهم راح افضي حالي شوي للمدونة والبيج واعوض عن الايام الي مضت وراح تكون اول هالافكار طريقة عمل كيكة الزيبرا مع ريبون الهدية بشكل مميز وجميل تابعوا معي الصور وكل خطوه لانو في نقاط واشياء لازم اوضحها لكل فكرة وصورة 

اول شغله بلشت فيها عمل الريبون لانه لازم تجف تماما قبل البدا بتغطية وتزيين الكيكة وانا عملتهم من الصبح للمسا لحتى جفوا وحطيتهم عالكيكة

هنا اخدت قياسات دقيقه للريبون لحتى تطلع مرتبه وبيرفيكت

على اي عصا بنعلق اجزا الريبون عشان ياخده الشكل ومن طرف كل وحده حطيت مي ولزقتهم ببعض وبس يجفه بسحبهم وبطلعهم من العصا ولازم نخليهم على هالحال لمدة 24 ساعة اقل شي اذا بدون gumpaste اما اذا استخدمت الgumpaste بالكتير ربع ساعه وبيجفه وهالشي بيرجعلك طبعا"

وبخصوص الكيكة كانت طريقة الكيكة الاسفنجية الي عالرابط http://piink-cake.blogspot.com/2013/01/blog-post.html

هي مقدارها صغير بتعمل كيكة بصينية من 7 _8 انش تقريبا

والكريمة هالمره استعملت فقط الدريم ويب لاني كنت مستعجله وما عملت كريمة زبده وما كانت متوفره عندي الكريم شانتيه بحسها بتكون متماسكه اكتر واسهل بالشغل

عشان نعمل خطوط الزيبرا رحت قصصت لون فوندان اسود بشكل عشوائي ولزقتهم بالمي عالكيكة

هالخطوه اختياريه ممكن نعمل خط بالفوندان او نحط شبر بس انا فضلت اعمل كرات وعشان تطلع الكرات متساويه رحت قصيتهم متساوي وكورتهم وحطيتهم والطريقه كانت اسرع من انك تعملي كره كره واسهل واجمل

هالخطوه مهمه كتير لاني ما حطيت فندان عادي لا رحت جبت قطعة فوندان وحطيت عليها مي منيح وعجنتها لحتى صارت طرية جدا ولزجه وبتلزق بالايد عشان اثبت عليهم اجزاء الريبون

وبهالصورة انا كنت ع اساس خلصت وانتهت الكيكة وبس شفتها حسيتها ناقصه شي واتذكرت صورة شفتها عالنت بس ما لقيت طريقتها وخمنت ورحت جربت وجبت فوندان لون اسود وعملته متل خط وحاولت اني اخليه متساوي عشان هالشي بيفرق بالشكل النهائي لحتى نحصل على كيكة متقنه ومرتبه بقدر المستطاع واذا متوفر عندكم الاداة الي بتطلع الفوندان خيطان بيكون احسن واسهل وبعد ما جفت اجزاء الريبون تماما" رحت حطيت مي على طرفهم ولزقت الخط الاسود لحتى نحصل على الشكل النهائي للريبون الي بالاطراف السوداء والحمدلله طلعت النتيجه النهائية مرضيه بالاضافه هاي واعطت شكل مميز وجميل وشكرا لمتابعتكم وتشجيعاتكم وانتظروني بكيكة وفكرة جديده ان شاء الله بالمرات القادمة ودمتم بود :)